Gratulerar med dagen!

I dag har mi mormor og Teodor si oldemor bursdag. Ho fyller, utruleg nok, 82 år. Ei sprek dame som ikkje er redd for å prøve seg på nye ting. Stadig vekk inne på bloggen for å sjå om det er noko nytt, skriv kommentarar, sender sms og mms, føl med på det som skjer. Ei dame som for meg har vore ei trygg og god mormor det alltid var godt å kome heim til. Ei som laga kakao til frokost, laga verdas beste stompekaker og alltid hadde ein klem på lager.

Slik er du fortsatt, mormor. Alltid godt å kome heim til Mjelstad til deg og morfar. No gler me oss til å ta med vesle Teodor til dykk. Han er heldig som har ei så sprek oldemor og oldefar. Så gratulerar så mykje med dagen, mormor/oldemor Elna Jørgine! Eg er veldig glad i deg, og det er alle dei fire gutane her i heimen òg! Gler oss til neste gong me treffes!

Mammahjarte

Eg visste at det å bli mamma var noko stort. Noko ein ikkje kunne forklare med ord. Noko ein ikkje veit korleis kjennes før ein er det. 25. mars opplevde eg å bli mamma. Vesle, nydelege Teodor på 52 cm og 3740 gram var plutseleg ute av magen. Han var her, hos oss! Og han var vår!

Den kjærleiken eg kjente då eg hadde han hos meg for fyrste gong, hadde eg aldri kjent før. Ikkje slik, ikkje så sterkt. Det var som om hjarta mitt gjekk over frå å vere "berre mitt" til å bli eit mammahjarta. Så fylt av kjærleik og omsorg for denne vesle guten. Samstundes så sårbart. Fylt av mange "tenk om"-tankar. For tenk om noko hender med den vesle, tenk om eg ikkje klarar å ta vare på han, tenk om eg ikkje taklar rolla som mamma, tenk om...

No har eg vore mamma i over ei veke. "Tenk om"-tankane er der framleis, og truleg vil dei alltid vere der. Det er vel ein del av det å vere mamma. Mammahjartet blir berre større og større. Teodor er ein vakker gut. Eg er så uendeleg glad i han. Tenk at han kom hit til oss! Dagane og nettene går. Soving, amming, bleiebyting, bading, soving, trøysting, amming... Kanskje blir det rutine etter kvart. Men akkurat no er alt så nytt. Så godt. Så meiningsfylt. Så riktig.

Teodor er vårt vesle mirakel.

Gratulerar med dagen!

I dag, 24. mars, fyller to viktige personar i livet mitt år. Og det fortener ei lita oppdatering på denne sjeldant oppdaterte bloggen...

Mi kjære mamma fyller nemlig 54 år i dag. Du er ei heilt fantastisk mamma, alltid full av gode ord, råd, tankar og omsorg. Du har alltid tid til oss barna, uansett kva det måtte vere. Du har mykje omsorg, både for oss som står deg nær familiært sett, men også for andre i samfunnet. Tusen takk for den du er! Eg er kjempeglad i deg!

Min kjære ektemann, Arnt-Inge, fyller 35 i dag. Hipp hipp hurra! Du er den beste mannen ein kan ha, og eg er så glad for at eg fann deg! No har me vore gift i nesten to år, og snart kjem vesle junior Angelskår/Steffensen til verda. Det blir stas :o) Takk for at du valgte å la meg komme inn i livet ditt, du er heilt super. Gler meg til resten av livet ilag med deg.

(Og her skulle det vore eit fint bilde av mamma og Arnt-Inge, men det var ikkje så lett å få til i dag... Fekk rett og slett ikkje "lov" av nettlesaren å laste opp, så det får heller komme ein annan gong...)

Ha ein god dag du som er innom!

Velkommen!

Seint i går kveld blei eg tante til verdas flottaste gut. Og eg er superstolt tante! Bilete av den vesle vil de nok få sjå på bloggen til hans flotte mor, Camilla Jørgine. Men eg vil berre ynskje han velkommen til oss her på bloggen min også.

Tenk, eit fantastisk, lite menneske har kome til to nydelege foreldre som ikkje veit kva godt dei kan gjere for han. Eg ber om at Gud må ta vare på den vesle familien på tre, dagane dei har framføre seg og alt dei no kjem til å oppleve.

Som ei lita helsing til guten og foreldra, kjem her første verset frå ein nydeleg dåpssalme, skriven av Eyvind Skeie:

Velkommen til livet, du lille,

velkommen til menneskets jord.

Velkommen til oss og de andre

som lengter og håper og tror.

Vi holder deg i våre hender

og ber i Guds hellige navn:

La livet bli godt for den lille,

for barnet vi fikk i vår favn.

Ventetid...

Eg er ingen god ventar...som så mange andre, er eg utålmodig etter å kome i gang med ting. På å bli feridg. Og så er det tid for ny venting. Øver meg på å bli betre til å leve her og no. På å setje pris på det som er, ikkje berre på det som kjem.

Dei siste sju-åtte månadane har eg venta på å bli mamma. Synes lenge at tida gjekk fort. Men i det siste syns eg tida har hatt så god tid! Eg gler meg slik til å bli kjent med knøtteliten inne i magen! Kven er ho/han? Denne veka har eg også måtta gjere det eg absolutt ikkje ville. Eg har blitt sjukemeld 40 %. Var ein lang prosess før eg innsåg at det ville vere til det beste både for meg sjølv, knøtteliten og dei rundt meg. Så i dag "debuterer" eg med min første sjukemeldingsdag. Sju veker att til termin. Fire veker att til permisjon.

Så no skal eg verkeleg setje venteevnene mine på prøve. For dagane heime blir rolege. Dagane på jobb har vore hektiske. Dagane heime gir meg god tid til å tenke. Planlegge. Drøyme. Ynskje. Vere redd. Bekymra. Skremt. Og så utruleg utålmodig! Då er det godt at veslesyster kan bidra med litt spenning i kvardagen! Snart blir eg tante til ein liten gut! For i dag er termindatoen til mi flotte veslesyster Camilla (omtala i sist innlegg) og hennar gode ektemann, Eirik.

Heldigvis trur eg det er sant det som blir sagt; den som ventar på noko godt, ventar ikkje forgjeves.

Har kjøpt "ventetulipanar" som minnar meg om at snart er kanskje våren her... Og når våren er her, då er også knøtteliten her :)

21. april 1984...

...då vart eg storesyster for fyrste gong! Ei herlig, lita tulle ved namn Camilla kom til familien i Einehola. Herleg er ho fortsatt, men ikkje like liten. Ho har vorte ei vaksen og herleg dame, ei veslesyster som ikkje berre er syster men også god og fortruleg ven. Camilla Jørgine, som ho no heiter (vakkert namn på ei vakker jente), er ei av dei kjæraste venninnene eg har. Ho er full av omsorg, omtanke, gode råd, ideear, venlege ord og ærlege tankar. Camilla er god! Ho gjer livet betre for dei rundt ho; både mann, familie, vener, kollegaer og andre ho treff i kvardagen.

Og i dag fyller altså denne vakre jenta 26 år! Gratulerar så mykje med dagen, heldige er dei som får feire ilag på dagen din. Vi får heller ta igjen feiringa til helga!

Veldig glad i og takknemlig for deg, Camilla!

Her er eit lite bilete frå ein stor dag i livet mitt - bryllupsdagen til Arnt-Inge og meg. Og du stilte opp som fantastisk forlovar på alle moglege måtar. Tusen takk!

Sommaren är kort...

...men det er ikkje vinteren! I alle fall ikkje denne! Eg likar igrunnen vinter; snø, kulde, ski, aking, vinterklede, vottar, hue, sjal... Men må innrømme at eg er enda litt meir glad i våren. Og sommaren. Synes kanskje denne vinteren her har vore litt i lengste laget! På ei side er det jo fint med snø. Kan til dømes ta mange fine bilete! Og ekte vintervêr er så absolutt å foretrekke framfor slaps, regn og sludd. Men no har snøen lagt sidan i fjor! Og eg er kjempeklar for vår!

Ser fram til dei første vårteikna; lysare dagar, hestehov, bar bakke, knopar på trea, fuglesong, lyd av elva som er full av vatn fordi snøen smeltar, drypping frå taket, vårsol i andletet... Å, det skal bli deilig!

Men enn så lenge får eg berre nyte det å ha ein skikkelig vinter her aust. Det er jo enkelt med snø; alltid nokå å gjere ute for ungane, reint og fint, passe kaldt, greit å vite kva ein skal kle seg med. Så joda, snøen er grei, den. Og sidan det berre er 8. februar i dag, skal den få liggje litt til. Men i mars, då er eg klar for vår!

Så nokre vinterbilete frå det snøkledde austland.

2010

Godt nytt år!

2010 er godt i gang, faktisk heile fem dagar gamalt! Så langt har året vore kaldt, fint, snøfylt, solrikt, ISkaldt og avslappande. I morgon startar jobbkvardagen igjen, og det kan nok bli litt hardt. Merka i dag då eg stod opp klokka 0700 at det føltes alt anna enn naturleg og bra...og i morgon må eg opp enda før det. Jaja, i staden for å grue seg til slikt, kan eg jo nemne fine ting ferien har bragt med seg!

• Kjekk julefeiring i eigen heim for første gong! Og for første gong med "eigenprodusert" pinnekjøt.


• Spennande køyring på snøfylte vegar på veg til Gardermoen tidleg, tidleg, tidleg 2.juledags morgon... (litt i overkant spennande, ifølge min mann, sjåføren...men me kom trygt fram!)


• Mors og fars pinnekjøtmiddag i ekte Eineholatradisjon 2.juledag. Heile familien samla, nydeleg middag og herleg stemning rundt bordet. Nesten som julaftan!


• Herlege romjulsdagar i Einehola ilag med foreldre, søsken og svigersøsken. Tenk at eg har ein så flott familie!


• Tradisjonsrikt og triveleg 3.juledagsbesøk hos mormor og morfar ilag med heile slekta på Mjelstad-sida, 27 i alt. Nok ein gong: tenk at eg har ein så flott familie! Absolutt noko å vere takknemleg for!


• Bytur til Bergen (verdas flottaste by?) ilag med veslebror, storesyster, kommande svoger samt herleg ektemann.


• Me fann bilen nesten med ein gong då me landa på Gardermoen veslenyttårsaftan! Og det tok berre ein halvtimes graving før den var klar til å frakte oss heimover.


• Nydeleg nattmat hos svigerforeldre på veg fra Gardermoen til heimen vår.


• Flott nyttårsfeiring med gode vener og veners barn på Sjøglimt. God mat, gode folk og godt nytt år!


• Kalde og klare januardagar med innekos, aking, nyttårsfrokost, fyr i peisen, høgtlesing i skogen på kvelden, turgåing, Oslo-tur...


• Besøk på "gamleskulen" i Oslo der eg møtte fantastiske elevar og kollegaer. Mine tre første år som lærar har gitt meg mange gode minner, og mange gode møter med flotte menneske som eg vil huske lenge, lenge, lenge...

Og her nokre bilete som frå desse dagane:

...takkekort...

Ja, no har me vore gift i fleire månader alt! Det kjennes veldig godt å ha starta livet ilag "på ordentlig". Og etter vel tre månader må eg seie at eg blir meir og meir glad for valet vi gjorde i juni. Arnt-Inge er ein kjernekar!

Eg stortrivst i huset vårt på landet, og har starta i jobb på ny skule, noko som også har gått veldig bra. No har eg haustferie (eller haustavspaseringsveke, som ein kollega likar å kalle det). Og uavhengig av namn, så er det ei veldig god veke. Har vore i Oslo og besøkt søster og svoger, vore på kafe med tidlegare kollegaer, rydda litt, slappa av ein del og kosa meg enda meir. Og enda er det berre onsdag!

I kveld har eg brukt litt/ein del tid på takkekort. Vi har ikkje bestemt oss enda for kva lay-out vi skal legge oss på, men mange forslag har vi. Har funne ei side på nettet som verkar veldig bra, så vi kjem nok til å bruke den. Men det er vanskeleg å velje ut biletet/bileta vi vil bruke! Og kva tekst skal vi ha? Det hadde vore så greitt å få nokre prøveeksemplar i handa før ein trykka på "bestill"-knappen. Jaja, det blir vel ei ordning. Vi har sett frist til før jul for å få alt pakka og klart og sendt ut. Enda litt tid, altså.

I skrivande stund driv min kjære mann og min kjære svigerfar og ryddar etter å ha pussa to teglsteinveggar i stova. Og utan å forklare for mykje kva dei har gjort og kvifor dei har gjort det, så kan eg seie at dei har vore veldig flinke, og at resulatatet ser strålande ut! Gjenstår enda ein liten vegg og litt krinkelkrokar rundt sjølve peisen før jobben er ferdig, men det tar me (dvs dei) til veka. Så dei som er interesserte kan gjerne ta ein tur for å sjå kor fint det har blitt!

Litt til bryllup

Har du lyst å følgje litt med på bryllupsplanane til Arnt-Inge og meg? Gå inn på denne linken, så finn du ein aldri så liten bryllusblogg :o)

I dag er det forresten 66 dagar att!

Eg gler meg til sommaren...

...for då skal Arnt-Inge og eg skal gifte oss! I januar fridde han, og no er det meste av tid og stad bestemt. Me gler oss stort, kan nesten ikkje vente! Samtidig er det igrunnen godt at det enda er ei stund (107 dagar fortalte han meg i dag) til det skal skje. Er jo ein del som må ordnast først. Men det beste av alt med dette, er at eg skal få dele alle framtidige dager i lag med han som eg er så glad i. 27.juni er dagen då han og eg skal seie ja til å dele resten av livet med kvarandre. DET skal bli ein god dag!

Julekalenderkos

Når året vårt tikkar mot advent,

eg håpar på post, og eg er spent;

Kjem den i år

slik at eg får

ein sjanse til pengar, litt lettent?

Og trufast så ligg den og ventar

når eg uti kassen den hentar.

Eg blir veldig gla'

og tenkjer "Hurra!"

Eg håpar at dette seg gjentar.

Til no har det blitt lite pengar,

men likevel; skrapinga fengar!

Så takk, kjære far

fordi at du tar

på alvor ein advents-tilhengar!

Frost

ein kald oktobermorgon

ute er det frost

inne er det varme i peisen

ullteppe

og tøflar

ute er det frost

vakker frost

iskrystallar

fascinerande mønster

kulde

og inne ventar varme i peisen

ullteppe

tøflar

og ein varm kopp kaffi

Den store bryllaupshausten - del 2

Tre veker etter det flotte vestlandsbryllaupet, stod eit nytt, flott par klare for å gi kvarandre sitt "Ja!". Denne gongen var det vakre Rømskog som var staden, og paret var Emma Sofie og Jan Krister. Og eg var så heldig at eg fekk æra av å vere Emma sin forlovar. Det vart ein nydelig dag med eit fantastisk par og en herlig fest både i kyrkja og i kommunehuset. Brura og brudgommen stråla om kapp med kvarandre, og talane og godora var mange og ektefølte. Ein heilt perfekt dag! På bileta under ser du nokre få augneblink frå dagen. Fleire bilete kan du få sjå dersom du avlegg eit besøk heime hos meg ;o) Nyt det flotte paret!

Den store bryllaupshausten

Dette har vore ein flott haust! Travel både på jobb og privat, men fin også. Eg har vore så heldig at to jenter har spurt meg om å vere forlovar for dei når dei skulle seie sitt "Ja" til sin hjartans utkåra. Og eg svara sjølvsagt ja til dei rause og ærefulle tilboda. Det fyrste bryllaupet fann plass i Alversund kyrkje laurdag 30.august 2008. Då var det mi kjære veslesyster, Camilla, som lova Eirik å dele resten av livet sitt med han. Her kan du sjå nokre bilete frå denne fantastiske dagen:

Då var dei mann og kone!

Dei nygifte saman med forlovarane sine

Gratulerar med dagen, morfar!

Til morfar: No er du det tredje

aprilbarn som eg her vil hedre

Ein mann av få ord

(litt ulik mi mor)

Men me kunne ei fått deg bedre

For du bryr deg om folka rundt deg

Eit omsorgsfullt andlet er ditt preg

Du likar jo godt

når alt stort og smått

er heime på Mjelstad der hjå deg

I huset til deg og til mormor

finn eg avslappingsplassen min på jord

Eg har sove bort

eit par timar fort

For roa hjå dykk den er så stor

Gratulerar så mykje med dagen, morfar! Håpar du har ein god dag, og at du blir gjort litt ekstra stas på. Takk for at eg alltid får lov til å komme heim til deg og mormor :o) Er lenge sidan eg har vore der no, men eg gler meg allereie til neste gong. Håpar det ikkje blir for lenge til. Glad i deg, morfar.

Klem frå Elisabeth

Camilla, my beloved sister

i dag har du bursdag, Camilla

på lim'rick har eg visst fått dilla

her e ein te deg

"god bursdag" frå meg

husk på at du e fin i lilla

Eit litt usakleg innlegg? Nei, eg prøvde mitt beste. Men formen e liksom ikkje heilt der verken fysisk eller limricksk. Men Camilla, som fylle 24 år i dag (HURRA HURRA HURRA!), fortjente et innlegg okke som. Ho e nemlig heilt super, både som søster og venninne. Veldig glad i deg, Camilla. Glede meg stort te i mårå når du og Eirik kjem ein tur. Og glede meg enda større (viss det går an å seie, og det trur eg ikkje...men du fatte poenget?) til bryllupet i august. Tenk, lille Camilla skal bli kone. I alle undersøkelsa du skal fylle ut så må du heretter (eller egnetlig deretter, fordi du gifte deg jo ikkje i dag sjøl om du har bursdag i dag...men deretter blei liksom litt feil det og...) krysse av på "GIFT". Stas :o) Litt nedtur for oss to storesøstre at du var den første av oss som kom så langt, men me håper (og trur :o)) at me kjem etter. Glede meg med deg både på bursdag og i bryllupsforberedelsa. Du er heilt topp. Glad i deg, Cammi :o)

Og så er du fin òg, berre sjå her:

Grattis te mormor!

Mi mormor ho surfar på nettet.

Kor gamal ho er? Prøv å gjette!

Fir' snes minus ett!

Du fekk nok'kje rett,

Men talet er faktisk det rette.

For mormor tør prøve det meste.

Tar utfordringar fleir' enn dei fleste.

Radio, mobil,

alt gjer ho med stil.

Og er ikkje redd for å teste.

I dag så har ho altså bursdag.

Og då skal ho få eit blogginnslag.

For mormor er bra,

heilt super å ha!

Er glad for å ha ho på mitt lag.

Glad i deg, mormor!

Klem frå Elisabeth

Om å gjere grep...

Eg trur eg må gjere eit grep snart

I dag stod det for meg krystallklart;

Ein utrena kropp

gir altfor fort opp

mot angrep frå virus og ant rart

For nok ein gong låg eg der sliten

Eg kjente meg faktisk litt liten

Oppkast og sånn

det er jo heilt bånn

(skal spare dykk for detaljbiten)

Så no skal eg komme i form fort

I alle fall skal eg få litt gjort

Symjing, gå tur,

Ein sabla god kur

Eit virus vil då komme til kort

(Dette limerick-innlegget må lesast med stor velvilje; det er ikkje alltid rytmen seier seg sjølv, men legg trykk på orda på ein litt rar måte, så stemmer det altså ;o) Rita, du får det nok til i alle fall, e jo min limerick-buddy)

Alle innlegg med respekt for seg sjølv, krev igrunnen eit bilete eller to, denne gongen blei det eit av min kjære og meg på nyttårdsbordtur på Color Fantasy ilag med jobben te Arnt-Inge. Ein superfin tur! Akkurat her er me i Kiel, litt trøtte begge to, men fornøyde likevel.

O jul med din glede!

Jula er så mykje. Blant anna god mat og hyggelig selskap. Og dette ser du på bileta under. Dei er (stort sett) teke under årets julemiddag. Som sjølvsagt var pinnekjøt, poteter, erterstuing, gulerøtter, kålrabi og smelta smør. Like sjølvsagt var det blanda frukt med vaniljesaus til dessert. Noko som burde vore sjølvsagt, men ikkje var det i år, var at minstejenta (for ho er faktisk det) ikkje kunne feire ilag med oss. Camilla måtte arbeide både veslejulaftan og 1.juledag, så då blei det austlandsjul på ho. Heldigvis skulle også hennar kjære Eirik feire austlandsjul, så då blei det fellesfeiring på dei. Og det gjekk nok bra, sjølv om saknet etter Camilla var stort her heime. Nyforlova som ho og Eirik var/er, så var det nok litt kjekt å vere ilag denne jula og. Håpar og trur det blir vestlandsjul på begge to til neste år.

God jul, alle saman!